كانت لي دردشة مع الوالدة يوم : 03 نوفمبر2021/م حول تأخر الجزائر خاصة والدول العربية عامة فكان جوابها هو تركوا دينهم فضعفوا فتكالبت عليهم الأعداء فاستخربتهم ونهبيت خيراتهم ونفثت سمومها فيهم فقلت وما المخرج يا أماه ؟ قالت إرجعوا الى أصلكم وأصالتكم ودينكم الذي به سدتم فقلت لها وماذا فعل جنود خرنسا خاصة في قريتنا العالية ؟ فقالت فعلوا الأباطيل وما فعلوا خيرا هم وأعوانهم الحركى من بني جلدتنا عليهم لعنة الله فحكت لي قصص وقصص فحواها منكرات يندى لها الجبين وبعض ذلك لخصته في في قصيدتها الموسومة التالية :
عندي قصة ، أعطوني فرصة نحكيلكم ما صار
وحكام فرنسا الكلبة قتالة الأبطال
الدمعة تجري والصغير في حجري
من ثدي أمو عطشان
صغير كاتم همو إداو أبيو وزادو عمو
متمرمد حالو, هزو جدو وزادو خالو
العين تبكي ولربي تشكي
ما هوشي محال ويعودو الأبطال
حكم الكفار والبيبان من العشوة تتسكر
لا ضو لا نار.............
ممنوع الكلمة وانباتو في الظلمة
حكم اليهود ’ تاريخ أيامو سود
الموجود يعطيك أوصافو
الكبار يعانو والصغار إخافو
جرحي ما براش من عيشة الأوباش
سلعة مرة ’ إقصو في الجرة
راحو للكفار يعطوهو في الأخبار
شوف الجهالة , فينا واش دارو
كلاب العسة جاونا يتجارو
جارت الأمحان وقلبي تعبان
راني موتية والمتولي طحان
يحب أوليدات الرومية
يا خداع الدين , العروبة وين ؟
دم الثوار يفتحلك باب النار
في الدنيا مهيون ,
وفي الآخرة تشوف أفعالك
روس الأبطال لان جات المناسبة
يوروهالك..........
جبهة الأحرار طالبة منك الثار
روح فتال الأرواح ما تقبلش الدية
إللي دارتو فرنسا ما هوشي شوية
البية تبكي غاظها الحال قالت هذا محال
عيب وعار خيول الثورة عند الكفار
الخيل تبكي جاتني تشكي
قالتلي عيب وعار تهدوني للكفار
كنت عون للثوار......
لان جريت نفوت الريح
والسيوف تشالي ’ محال انطيح
الشهداء أهلي , وطني غالي
الحصان يصهل تاريخو تبهدل
المجرم ظالم , خالف النظام
واش ربي صابو ؟
عليه اللعنة مع ديقول واصحابو
خيول الصحراء مشهورين
وناس الظهرة معروفين
في الندهة موجودين
العود صحيح لان ناض يفوت الريح
الهاربة محال نفوتو
واحنا أهل الحق ’ وعليه نموتو
شفت الكلاب عادو أصحاب ؟؟؟
تحابو من الأظفار,
يعطيهم سبع أضرار
والناس في السرقة حسابهم عند الله
والحسنة ترجع سيئة
ربي ليك الهربة , لا من غيرو معين
العود مسكين إبات يخمم
راسو يفهم وقلبو يتألم
فضل الإنتحار
وما يعيشش مع الكفار
بلادي حرة وفيها نتنعم
أصلي محرم ومن حقي نتكرم .
من كلمات السيدة / أم الخير مشرى
ليست هناك تعليقات:
إرسال تعليق